Кыргызстан менен Түрмөнстандын мамлекеттер аралык көп жылдык келишимдерине карабай, көпчүлүк суроолор чечилбеген бойдон калууда. Алсак, түркмөн ишкерлери кыргыз Жогорку окуу жайларынын дипломдоруна ишеним бере албай келе жатат. Буга 5 жылдын жүзү толуп калды. Түркмөндөрдүн Кыргызстанда билим алуусуна жашыруун тыюу салуу аракети 2009-жылда башталган. Ушул эле жылы 200 дөн ашуун студент жайкы каникулдан кийин Кыргызстанга кайтып келбей, окуусун уланта албай калган. Мындан жарым жыл өтпөй ал студенттер АКШнын Болгариядагы университетине жана Санкт-Петербургдагы окуу жайларга жайгаштырылган. Ошондон тарта кыргыз ЖОЖдоруна тапшырган түркмөндөрдүн саны кескин азайып, 2012-жылдагы окуу жылында 66 студенттин 7си гана дипломун ала алган. Акыркы 2 жылда түркмөн студенттеринин аягы таптакыр тыйылган. 

Эскерте кетсек, Кыргызстанда билим алган чет элдик студенттерге контрактык негиздеги төлөмдөр жергиликтүү студенттерден кымбатырак болот. 2015-2016-жылдын окуу жылында чет элдик студенттердин окуу төлөмү 700-800 АКШ долларынан 1000 доллардан жогору баага чейин көтөрүлгөн. Мындан улам кыргыз ЖОЖдорунун кымбатташы жана түркмөн ишкерлеринин кыргыз дипломдоруна төмөн баа берүүсү чет элдик студенттердин келишин азайтты дешет серепчилер.